Украинадағы Президент сайлауының екінші турында Виктор Янукович жеңіске жетуі мүмкін. Алдын ала мәліметтерге қарағанда, ол 48 жарым пайыз, ал Юлия Тимошенко 46 пайызға жуық дауыс жинаған. Жеңіске ресми түрде әлі қол жеткізбесе де, Виктор Янукович республикалық телеарналардағы тікелей эфирде Премьер-министрдің отставкаға кетуін талап етті. Ал Юлия Тимошенко сайлау қорытындысының толық мәліметі шыққанша, президенттіктен үмітті екенін мәлімдеді.

Сайлаудың алғашқы қорытындылары шыға бастағанда екі үміткер арасында алшақтық басым болғанымен, қазір ол екі пайызды ғана құрап отыр. Яғни, 46 пайыз дауыс жинаған Тимошенкодан 48 жарым пайызбен Янукович алда келеді. Керісінше, тұрғындардың 4,4 пайызы екі үміткерге де қарсы дауыс беріпті. Айта кететіні, Президент сайлауының бірінші кезеңіне қарағанда, екінші кезеңінде сайлаушылар белсенділік көрсетіп, саяси шараға дауыс беруге құқығы бар тұрғындардың 69 пайызы қатысқан. Сондай-ақ, 2004 жылы болған президент сайлауындағы сияқты биыл да саясаткерлер мен саясаттанушылар жеңісті Виктор Януковичтің еншісіне беріп қойды.

Виктор Янукович, Украина президенттігінен үміткер:

- Тимошенконы қолдаған және оны екінші турға дейін жеткізген сайлаушыларға менің өз айтарым бар. Сіздердің үміттеріңіздің толық ақталуына мен де уәде беремін. Ал Тимошенконың өзі үкімет басқарудан бас тартуы тиіс.

Сондай-ақ, Премьер-министрдің жақтастары кейбір аймақтарда сайлау қорытындысының өрескел бұрмаланғанын айтып, шеру ұйымдастыруға бекініп отыр. Ал Юлия Тимошенко наразылыққа шығуға да, жеңілісті мойындауға да әлі ерте деп естептейді.

Юлия Тимошенко, Украина президенттігінен үміткер:

- Менің айтқым келетіні, Янукович жеңді деу - тек болжам ғана. Сондықтан толық мәлімет шықпайынша, тоқтамаймын. Әрбір дауыстың дұрыс есептелуін және заңбұзушылықтың болмауын жіті қадағалаймын.

Қазір Орталық сайлау комиссиясы сайлаушылардың 95 пайыздан астам дауысын естептеп қойды. Ал сайлаудың нақты қортындысы тек 10 күннен кейін белгілі болады.

Форумға ойласу