Алматы облысы Жетіген ауылында шатырына 120 миллиметрлік әуе бомбасы түскен үйдің қожайыны Қорғаныс министрлігінен өтемақы алатын болды. Сот шешімі бойынша оған 33 миллион теңге төленуі тиіс.

Әйткенмен Әуе қорғанысы күштерінің бастығы Александр Сорокиннің айтуынша, сот белгілеген бұл қаржы келтірілген шығын мөлшерінен әлдеқайда көп. Аталған ауылда 33 миллион теңгеге қосқабатты бірнеше зәулім үй салуға болады. Өткен жылдың қазан айында Су-24 ұшағынан жаңылысып тасталған бомба Зукаевтар үйінің шатырына түсіп, үйдің қабырғасын тесіп өткен. Абырой болғанда, бомба жарылмай қалды және үйде сол сәтте ешкім болған жоқ. Әскери бөлім командирі төтенше оқиғадан кейін бүлінген үйді өздері жөндеп беруді ұсынған. Бірақ үй иесі басында келіскен сыңай танытқанымен, кейін айнып қалған. Әуе қорғанысы күштері басшылығының айтуынша, сараптаманың ресми қорытындысы әлі шыққан жоқ.

Форумға ойласу